Дэлхийн банкны санхүүгийн ахлах мэргэжилтэн Бенжамин Тиласони Монгол Улсын Орон сууцжуулалтын үндэсний хорооны гишүүдтэй уулзсан байна.
Уулзалтын үеэр орон сууцны урт хугацааны санхүүжилтийн бодлого, тулгамдаж буй асуудлуудын талаар хэлэлцэв. Тэрбээр манай улсын орон сууцны бодлого системийн уялдаа холбоо сул, орон сууцны үнэ өндөр, иргэдийн худалдан авах чадварт тохирохгүй байгааг онцолсон юм. Уулзалтаар анх удаа орон сууц худалдан авч буй залуу гэр бүл, олон хүүхэдтэй болон хөгжлийн бэрхшээлтэй иргэд, мөн нийслэлээс орон нутагт шилжиж буй иргэд зэрэг зорилтот бүлгийг орлогод нийцсэн орон сууцаар хангах нь Засгийн газрын тэргүүлэх зорилт болохыг онцоллоо. Мөн ипотекийн зээлийн эх үүсвэрийг нэмэгдүүлж, хүртээмжийг сайжруулах, урт хугацаанд хэрэгжих санхүүжилтийн тогтолцоог бий болгох талаар ярилцсан байна. Цаашид бүсчилсэн хөгжлийн бодлоготой уялдуулан, ипотекийн зээлийн хүртээмжийг нэмэгдүүлэх, үр дүнтэй, тогтвортой бодлого боловсруулах шаардлагатайг талууд ярилцжээ.
