Б.Алтанзул: Энэ бүх мэдээллийг бид мэдэж байна, хуурах гэж байгаа бол хэрэггүй шүү
Э.Одсүрэн
Орчны бохирдолыг бууруулах үндэсний хорооны нарийн бичгийн даргаар ахлуулсан ажлын хэсэг цагаан тоос, Хангал голын бохирдолтой холбоотой асуудлаар Орхон аймагт ажиллаж байна. Эрдэнэт үйлдвэр ТӨҮГ-ын Баяжуулах үйлдвэрийн дарга М.Онон болон холбогдох мэргэжилтнүүдтэй уулзлаа. Аймгийн БОАЖГ, МХГ, ЭМГ-ын мэргэжилтнүүд, удирдлагуудаас одоогийн нөхцөл байдлын талаар асууж, цаашид авч хэрэгжүүлэх ажлуудын төлөвлөгөөтэй танилцахыг хүссэн юм.
Хуурах гэж байгаа бол хэрэггүй шүү
Ажлын хэсгийн уулзалт хоёр цаг гаруй хугацаанд үргэлжилсэн ч Эрдэнэт үйлдвэр ТӨҮГ-ын зүгээс цаашид цагаан тоосны дэгдэлтийг буруулахад оновчтой шийдвэр хэлсэнгүй. Орчны бохирдлыг бууруулах үндэсний хорооны нарийн бичгийн дарга Б.Алтанзул хэлэхдээ: Бид бүхэн хийсэн ажлын талаарх тайланг сонсох гэж ирээгүй. Энэ бүх мэдээллийг бид мэдэж байна, хуурах гэж байгаа бол хэрэггүй шүү. Эрдэнэт үйлдвэр өөрөө бодлогын түвшинд цагаан тоосны дэгдэлтийг бууруулахад юу төлөвлөж байгааг асууж мэдмээр байна” гэв.
