"Эрдэнэт Мандал" овоог тахих ёслолын арга хэмжээ боллоо
Э.Одсүрэн
Газрын хэвлийн баялаг ашиглаж, уул уурхайн үйлдвэрлэл явуулдаг “Эрдэнэт үйлдвэр” ТӨҮГ “Долоон бурхан” од, “Эрдэнэт Мандал” овоогоо хоёр жил тутамд тахидаг уламжлалтай. "Эрдэнэт Мандал” овоог тахих ёслолд өрх гэрийн тэргүүн эрчүүд оролцож, аймаг орон нутаг, өрх гэр, үйлдвэрийн ажил үйлсээ даатгаж, ган гачиггүй, зуд турхангүй, аюулт өвчин тахалгүй, хур бороо цагтаа бууж газрын гарц арвин байхын тухайд шашны зан үйл үйлддэг. Энэ өдрийн 19.00 цагаас Цэнгэлдэх хүрээлэнд Монголын Бурхан шашинтны төв Гандантэгчэнлин хийдийн Тэргүүн Хамба Номун Хан, Гавж Д.Чойжамц сүсэгтэн олонд номын авшиг, утлага, рашаан, будаа хүртээнэ. Энэ үеэр шашин, соёлын нэгдсэн үйл ажиллагаа болох бөгөөд бурхан шашны дуулаач МУСТА Д.Ариунбаатар, Н.Наранхүү болон “Эрдэнэт” дуу, бүжгийн чуулгын уран бүтээлчид бурхан шашны холбогдолтой урлагийн үзүүлбэр үзүүлэхээр бэлтгэж байна. Энэхүү ёслолын арга хэмжээг түмэн олонд хүртээлтэй, сонсголонтой, үзүүштэй байх үүднээс техник, тоног төхөөрөмж, тайз заслыг өндөр хэмжээнд зохион байгуулахаар зорьж байна.