Эрдэнэт үйлдвэрийн шинэ захирал бүрэн эрхээ хэрэгжүүлж чадаж байна уу?

 “Эрдэнэт үйлдвэр” ТӨҮГ-ын Ерөнхий захирал асан Х.Бадамсүрэн үүрэгт ажлаа хүлээлгэн өгөхөөс өмнө  А/396 дугаар тушаал гаргаж санхүүгийн анхан шатны баримтад нэгдүгээр гарын үсэг зурах болон хуульд заасан захиалагчийн зарим эрх, үүргийг “Эрдэнэт үйлдвэр” ТӨҮГ-ын Тамгын газрын дарга Д.Үүрийнтуяад шилжүүлжээ.  Ингэхдээ энэ тушаалыг гарсан өдрөөс буюу 2022 оны 06 дугаар сарын 17-ны өдрөөс  эхлэн 2022 оны 12 дугаар сарын 31-ний өдрийг хүртэл хугацаанд хүчин төгөлдөр байхаар баталсан.

  Нэгэнт шинэ ерөнхий захирал томилогдсон учраас гарын үсэг зурах бүх эрхээ Г.Ёндон захирал өөрөө хэрэгжүүлэх ёстой. Гэтэл өмнөх захирлын тушаал он дуустал хүчинтэй байхаар гарчихсан. Ерөнхий захирлын бүрэн эрх, Тамгын газрын даргад шилжсэн эрх хоёр зэрэгцээ байж таарахгүй.

Харамсалтай нь Захиалагчийн зарим эрх, үүргийг гээд маш ерөнхий байдлаар тусгасан нь хүчин төгөлдөр буст тооцож болох  талаар хуульчид хэлж байна. Товчхондоо асуудал гарвал зугтах гэсэн арга заль л хийжээ гэв. Тиймээс өмнөх захирал Х.Бадамсүрэнгийн эрх шилжүүлсэн тушаалыг хүчингүй болгосон эсэхийг Эрдэнэт үйлдвэрээс тодруулахад тодорхой хариу өгөхгүй байгаа юм. “Эрдэнэт үйлдвэр” ТӨҮГ-ийн Ерөнхий захирал Д.Үүрийнтуяа юу эсвэл Г.Ёндон уу гэдэг асуулт эндээс гарч ирнэ. Өөрөөр хэлбэл Ерөнхий захирлаар томилогдсон Г.Ёндон санхүүгийн баримт бичигт гарын үсэг зурах эрхтэй эсэх нь эргэлзээтэй байна.   

Эрх шилжүүлэхтэй холбоотой хуулийн заалтууд: 

64 дүгээр зүйл. Төлөөлөх бүрэн эрх 

64.1.Төлөөлүүлэгч нь төлөөлөгч болон түүнтэй хэлцэл хийх гуравдагч этгээдэд төлөөлүүлэх тухайгаа болон төлөөлөгчийн бүрэн эрхийн талаар амаар буюу бичгээр мэдэгдсэнээр төлөөлөгчид бүрэн эрх олгож болно.

64.2.Бичгээр олгосон итгэмжлэл нь дараахь шаардлагыг хангасан байвал зохино: 64.2.1.Итгэмжлэлд төлөөлүүлэгч гарын үсэг зурсан байх, хуулийн этгээдийн итгэмжлэлд эрх баригч гарын үсэг зурж, тамга, тэмдэг дарсан байх; 64.2.2.Хуулийн этгээдийн эд хөрөнгийг хүлээн авах, бусдад шилжүүлэх, захиран зарцуулах эрх олгосон итгэмжлэлд эрх баригчаас гадна нягтлан бодогч гарын үсэг зурсан байх; 64.2.3.Олгосон он, сар, өдрийг заах; 64.2.4.Хуульд заасан бол нотариатаар гэрчлүүлэх; 64.2.5.Итгэмжлэлийг тодорхой хугацаагаар олгох бол хугацааг заах. 64.3.Энэ хуулийн 64.2-т заасан шаардлагыг хангаагүй итгэмжлэл хүчин төгөлдөр бус байна