Найрамдал багт 280 хүүхдийн хүчин чадалтай цэцэрлэгийн барилгын ажлын шав тавих ёслол боллоо. Тус багт цэцэрлэгийн насны 400 гаруй хүүхэд амьдардаг ч өнөөг хүртэл хүүхдүүдийг 18 дугаар цэцэрлэг болон “Унага” цэцэрлэгт хуваарилан хамруулж иржээ.
Шинэ цэцэрлэг ашиглалтад орсноор сургуулийн өмнөх боловсролын үйлчилгээний хүртээмж сайжирч, багийн хүүхдүүдийг өөрийн оршин суугаа орчинд нь сурч хүмүүжих боломж бүрдэх юм. Энэ талаар Найрамдал багийн Засаг дарга Б.Мөнх-Эрдэнэ “Манай багт цэцэрлэгийн насны 400 гаруй хүүхэд байдаг. Одоогоор тэднийг бусад цэцэрлэгүүдэд хуваарилан хамруулж байгаа. Шинэ цэцэрлэг баригдсанаар хүүхдүүдээ багтаа сургах нөхцөл бүрдэнэ” хэмээн онцоллоо.
Цэцэрлэгийн барилгын ажлыг NB компани гүйцэтгэхээр шалгарсан бөгөөд нэг жилийн хугацаанд барьж дуусгахаар төлөвлөжээ. Төслийг орон нутгийн төсвийн хөрөнгөөр хэрэгжүүлж байна.
